Etxegintzak, Donostiako Udalaren Etxebizitzaren Enpresa Erakunde Publikoak, duela gutxi aurkeztu die Agree proiektua Los Luises kaleko, Gaztelu kaleko eta Zarategi pasealekuaren zati bateko bizilagunei. Europar Batasunaren Horizon 2020 proiektuaren finantzaketa duen proposamen horren helburua da etxebizitzak birgaitzea energia-efizientzia eta irisgarritasuna hobetzeko.
Proiektuaren metodologia berritzailea dela-eta, energia-birgaitzeak eta irisgarritasun-konponbideak modu integratuan egitea proposatzen da, antzeko tipologiako eraikinen eskaria gehituz, proiektuen errentagarritasuna bultzatuz.
Donostiaren kasuan, hain zuzen ere, proiektua 622 etxebizitza dituzten 70 ataritan zentratzen da; haietako % 94an ez dago igogailurik eta bizilagunen batez besteko adina altua da.
Rafael Fariasek adierazi zuenez, hautatutako etxebizitzak isolamenduan inguratzaile eskasak dituzten eraikinak dira, duela 50 urte gutxienez eraikitakoak, eta ez dute igogailurik, baina bertako bizilagunen adina altua da.
Los Luises, Gaztelu eta Zarategi hautatzeko beste gako bat izan zen blokeen antzekotasuna, horrek aukera emango duelako “konponbide erreplikagarriak” sortzeko; izan ere, aldakuntzaren batekin proiektu bakarra egin daiteke, eta gero eraikin bakoitzaren berezitasunetara egokitu. Kasu gehienetan, lau solairuko etxebizitzak dira, eta ez dute igogailurik.
Nekane Arzallus zinegotziak nabarmendu zuenez, bere arloak gero eta gehiago lan egin nahi du eraikitako etxebizitzekin: «Gure gaur egungo etxebizitzak irisgarriak eta bizigarriak egitea da egin dezakegun politikarik onena, eta horri ekingo diogu datozen urteetan».
Aurkezpena Udaleko osoko bilkuren aretoan egin zen, eta bertan egon ziren Nekane Arzallus zinegotzia; Etxegintzako kudeatzaile Rafael Farias Blanc; Maider Romay, Etxegintzaren Birgaitze Saileko Arkitektoa; eta Xabier Aguirre, Agm aurreproiektua idatzi duen taldearen aldetik.
Udal-arduradunen iritziz, deialdia oso gogobetekoa izan zen; izan ere, kale horietako auzokide askoren interesa piztu zuen, proiektua zuzen-zuzenean ezagutzera hurbildu eta proiektuaren aurrerapenen berri izateko eskatu baitzuten.
Eusko Jaurlaritzako Etxebizitza Sailak, Tecnaliak, Ihobek eta Donostiako, Gasteizko eta Basauriko udalek osatzen dute AGREE; eta helburu gisa du EAEko etxebizitza-eraikin pribatuen energia-efizientzia hobetzeko inbertsioak bultzatzea.
Eskaera aktibatzeko eta gehitzeko, gobernantza hoberako eta finantzaketa-konponbide pertsonalizatuetarako mekanismo berritzaileen bidez konponbide berritzaileak ezartzen ditu hiru proiektu pilotutan, 8,5 M € inguruko inbertsioa mobilizatuz eta hemendik 2022ra bitartean 250 tona CO2 bal/urte murriztea lortuz.
Etxegintzak aurreproiektu bat proposatu du, eta, bizilagunen erkidegoen adostasunaren ondoren, haiei laguntzea proposatu du, azalduz eta alternatibak eta aurrekontuak aztertuz. Ondoren, proiektu teknikoak kontratatu eta garatuko dira, bai eta laguntzen eta dirulaguntzen eskaera ere. «Kostua asko aldatzen da auzotarrek beren etxebizitzetarako aukeratzen duten efizientzia-mailaren, bloke bakoitzaren ezaugarrien eta familia bakoitzak jaso ditzakeen dirulaguntzen arabera» azaldu zuen Fariasek.
«Nolanahi ere, guk proiektua eginda ematen diegu, laguntzen azterketa bat egiten diegu, eta Eusko Jaurlaritzan, Udalean eta EBn kudeatzen dugu, baina kostua bizilagunek hartu beharko dute beren gain. Horren truke, hobeto biziko dira, gutxiago gastatuko dute energian, eta beren etxeak errebalorizatu egingo dira obrarekin».
Europako proiektu honetan parte hartzeko interesa erakusten duten bizilagunen erkidegoak 943 413922 telefonora deitu ahal izango dute, eta azterketen emaitzei, jarduketa horietarako erabilgarri dauden laguntza ekonomikoei eta beren intereseko gainerako alderdiei buruzko informazioa jasoko dute.
